Շոու բիզնեսի ամենահայտնի դեմքերն ու Առաջին տիկինը` Անիտա Հախվերդյանի հեղինակային երեկոյին

 

Մի բաժակ սուրճ և ընկերական ջերմ մթնոլորտ` էստրադային երաժշտության հնչյունների ներքո. Երգի պետական թատրոնում երեկ կայացավ Անիտա Հախվերդյանի հեղինակային երեկոն, որին ներկա էին շոու բիզնեսի հայտնի դեմքերը։ Երգի թատրոնի դահլիճը փոքր է, բայց իր հարկի տակ միշտ ունենում է մտերմիկ երեկոներ. չէ՞ որ ամենամտերմիկ հանդիպումները կայանում են փոքր շրջանակում։

 

Բեմից հնչում են հայտնի ու սիրված երգերը, հետնաբեմում շոու բիզնեսի ներկայացուցիչները հավաքվել են, զրուցում են, հիշում երգի թատրոնում ու Անիտայի հետ անցած ճանապարհը։

 

Թե՛ դահլիճում, թե՛ հետնաբեմում սուրճի բույր է` բառի ուղիղ և փոխաբերական իմաստով։ Անիտան ասում է` իր երգերը սուրճի բույր ունեն, համերգի ընթացքում հանդիսատեսին դառը սուրճ հյուրասիրեցին երգերը ճիշտ վայելելու համար։ Երեկոն վարում էր Ավետ Բարսեղյանը, իսկ երբ Ավետն ու Անիտան հայտնվում են նույն բեմում, նշանակում է երեկոն համեմվելու է հետաքրքրաշարժ պատմություններով։ Tert.am Life–ը ներկայացնում է, թե ինչպես է անցել Անիտա Հախվերդյանի հեղինակային երեկոն և ինչ է կատարվել հետնաբեմում։

 

 

«Երբ ծնվեցի, նախքան ինձ տեսնելը ծնողներիս առաջին հիասթափությունն այն էր, որ աղջիկ էի, բայց տեսնելու ահագին բան կար։ Իհարկե, հիմա ձեզ դժվար է հավատալ, սակայն ասում են, երբ ծնվել եմ, աննկարագրելի սիրուն եմ եղել, իբրև թե, Մարգարյան հիվանդանոցի հղիները հերթ էին կանգնում, որ գային, մի աչքով տեսնեին ինձ։ Ես նման գայթակղիչ բաների իսկույն հավատում եմ, բայց ունեմ ավագ քույր, որն ասում է` սիրո՞ւն, ծանր «մութաքա» բարձի պես մի բան էիր` Վլադիմիրովիչի խոպոպներով։ Մի կողմ թողնենք հղիներին և Լենինին, թույլ տվեք ասել` բարև ձեզ, անձնագրով իմ անունն է` Մարգարիտա։ Տատիկիս անունն է, ով, գուցեև, հոգու խորքում շոյվել էր, որ իր անունն են տվել ինձ, սակայն համաձայն հախվերդյանական ցինիզմի, ասաց` մի «ղայդին» անուն չկա՞ր։  Երբ «ղայդինին» բերեցին տուն, մայրս քրոջս ասաց` Նունե ջան, ծանոթացիր, փոքր քույրդ է` Մարգարիտան, կարող  ես իրեն դիմել Մառչկա, Ռիտչկա, Մարգուշչկա։ Քույրս ասաց` ոչ մի Մառչկա, ոչ մի Մարգուշչկա, Անիտա։ Ինձ ոչ ոք չհարցրեց, գուցե, ես ուզում էի լինել Մարգարիտա կամ Անիտան էր լավ… Մինչև այսօր Երևանի սրճարանների մատուցողներին վարժեցրել եմ, իրենք ինձ  չեն հարցնում` ի՞նչ տեսակ սուրճ բերել, միանգամից բերում են դառը։ Շնորհակալ եմ, որ դուք էլ այսօր ինձ չեք հարցրել` գա՞լ, թե՞ ոչ։ Եկել եք, որովհետև  ենթադրում էիք, որ այսօր հնչելու են լավ երգեր»,– որպես նախաբան` ասաց Անիտա Հախվերդյանը։

 

Երեկոյին ներկա էր ՀՀ առաջին տիկին Ռիտա Սարգսյանը, ով հետնաբեմում ծաղիկներ նվիրեց Անիտային ու նկատեց, որ Մարգարիտա անունն էլ է իրեն սազում։

 

 

Անիտայի` սուրճի բույրով երգերին  լրացնում էր գարնան շունչը, որ տիրում էր բեմում։ Գարնան ու սուրճի թեման իզուր չէ այսքան արծարծվում։ Մեզ հետ զրույցում Անիտան ասաց, որ որոշեց այս փուլում հեղինակային երեկո ունենալ, քանի որ գարուն է, իսկ իր երգերը սուրճի համ ունեն։ «Սա իմ երրորդ ստեղծագործական երեկոն է։ Ընկերներս որոշեցին, որ ժամանակն է։ Արթուր Գրիգորյանն ասաց` այո, վաղուց պետք է լիներ։ Երգիչներից ով ցանկացել է, այսօր երգում է։ Բոլոր արտիստները սիրով և սրտանց են եկել»,– ասաց նա։ Ի դեպ, արտիստների շրջանում կային մարդիկ, ովքեր ներկայացնում էին այլ երգիչների երգերը։ Էրիկը կատարեց Արամ Ավագյանի «Իմ լուսին»–ը, Արամեն և Սիլվա Հակոբյանը` Արմինկայի և Արազ Դարեի «Սեր ու կարոտ»–ը, Արսեն Սաֆարյանը Մաշա Մնջոյանի հետ կատարեց «Ուշացած սեր» երգը, որը ի սկզբանե կատարում էր Սիրուշոյի հետ։

 

Անիտայից հետաքրքրվեցինք, թե իր երգերից, որի համն է առավել հոգեհարազատ իրեն։ «Ես սիրում եմ իմ բոլոր երգերի համը, եթե չսիրեմ, դուք այն չեք լսի», ասաց նա։ Այնուամենայնիվ, Անիտան պատմեց բեկումնային մի դրվագ, երբ ամաչել է իր երգի համար։ Տարիներ առաջ երթուղայինում լսել է մի երգ, որ իրեն առանձնակի «տանջանք» է պատճառել։ Իր հեղինակած խոսքերով երգը ճանաչել է միայն կրկներգից`«Չար մարդիկ մի չարչարեք»…  «Այդ ժամանակ ես հասկացա, որ կամ այլևս երթուղային չեմ նստելու, կամ հանուն գումարի երգ չեմ գրելու, իսկ երթուղային մինչև օրս նստում եմ»,– նշեց նա։

 

 

Տարիներ առաջ Անիտա Հախվերդյանի առաջին` «Ստեփանակերտ» երգը կատարել է Արթուր Գրիգորյանը։ Այս երեկոյին երգը կատարեց «Երգի պետական թատրոն» խումբը։ Տարիներ առաջ որպես հեղինակ` իր մուտքն ազդարարած երգն այս համերգին վերջինն էր։ Ինչպես Ավետը նշեց, Անիտան ներկայացրեց իր երգերը` հայրենիքի, քաղաքի, սուրճի իր բույրի, սիրո իր լեզվի մասին։ «Մենք այսօր իսկապես լիացանք ու գնացինք դեպի իսկական պատմությունը, որը կերտում է Անիտա Հախվերդյանը»,– ասաց հաղորդավարը, իսկ Անիտան, ում հետ Ավետն առաջին անգամ հայտնվել է բեմում` իբրև հաղորդավար, շեշտեց. «1000 կարատանոց  ադամանդ ունեմ` Ավետ Բարսեղյանը»։

 

Լուսանկարները` Հրանտ Մարինոսյանի

Be the first to comment on "Շոու բիզնեսի ամենահայտնի դեմքերն ու Առաջին տիկինը` Անիտա Հախվերդյանի հեղինակային երեկոյին"

Leave a comment

Your email address will not be published.


*


ԴԻՏԵԼ